Vázquez excúsase en rolda de Prensa

Fernando Vázquez compareceu en rolda de prensa e volveu pedir desculpas tal como anunciara no comunicado do luns á noite.

O técnico de Castrofeito disculpouse repetidas veces polas súas declaracións ainda que intentou aclarar, de xeito educado e coherente, a súa decisión de retirar a Matias Lequi cando apenas levaba 20 minutos no terreo de xogo.

Tamén expresou o seu apoio á Federación de Peñas no seu intento de unir ao Celtismo nestes dificiles momentos.

Podedes escoitar as declaracións de Fernando Vázquez en rolda de prensa grazas ao son dos compañeiros de Radio Vigo.

PREZOS CELTA-WERDER

O Celta xa publicou os prezos para o encontro de oitavos de Uefa fronte ao Werder Bremen. Oscilan entre os 45 de Tribuna e os 10 de Fondo. Os aboados terán que pasar por taquilla. +Info Aquí

As Peñas piden explicacións.

A fractura no Celtismo semella cada vez máis evidente.

Hoxe, as Peñas do Real Club Celta reuniránse co director Xeral do Clube nunha xuntaza na que, presumiblemente se pedirán explicacións sobre a situación do equipo e a relación cun adestrador do que, presumiblemente, pedirán á cabeza.

Este sector do Celtismo expresará así o seu malestar con todo o acontecido nos últimos tempos e solicitará ao Consello que rectifique na súa decisión de apoiar a Fernando Vázquez de xeito incondicional.

De tódolos xeitos, dende a web oficial da Federación de Peñas parecen desmarcarse desta postura e fan un máis que loubable chamamento á UNIÓN do Celtismo nestes dificiles momentos.

Dende TodoCelta sumámonos a este chamamento. É o momento de unir forzas entre todos e poñer en marchas iniciativas que poidan levantar o ánimo dunha afección deprimida, tal e como estamos facendo dende outros sectores do Celtismo.

Agora máis que nunca, HALA CELTA!

Chat SMS: Martínez Cobas

Este xoves 1 de Marzo, a partir das 20.30h, o Celta volve a por en marcha o xa habitual chat entre membros do clube e os siareiros que queiran participar.

Esta semana é o turno de Xabier Martínez Cobas, Director Xeral do RC Celta que ira contestando a todas as preguntas feitas vía SMS.

O Chat terá unha hora de duración e poderedes ir consultando as respostas na web oficial. En TodoCelta faremos un resumo coas respostas máis interesantes.

Lembrade que para participar tedes que mandar un SMS coa palabra CELTA(espazo)TEXTO, ao 7744 

Vigo invadirá Santiago

O Cometal Celta de Vigo F.S. afronta este fin de semana un partido moi importante de cara a seguir vivo na loita pola permanencia, un derbi de necesidades para ambos equipos, que non atravesan o seu mellor momento na tempada.

Pero malia que o equipo vigués xoga fóra de casa, non se vai a sentir só no Multiusos Fontes do Sar. Afeccionados do Cometal Celta de Vigo F.S. desprazaranse á cidade coruñesa para arroupar ao seu equipo nun choque tan importante.

O clube presidido por Jose González poñerá autobuses gratuitos a disposición de calquera persoa que queira presenciar o partido entre o Autos Lobelle de Santiago e o Cometal Celta de Vigo F.S. Os autobuses sairán do Pavillón de As Travesas ás 15:30 do mesmo día de xogo e regresarán a Vigo despois do partido. O prezo das entradas é de 10 euros para os adultos e 5 euros para nenos de entre 14 e 18 anos.

Todo aquel afeccionado que estea interesado en asistir ao partido debe reservar a súa praza no autobús, ben cunha simple chamada ao 986136234 ou pasándose polas oficinas do club no Pavillón de As Travesas

Venancio, o “Capitán Veneno”

Hoxe na nosa sección habitual de Mitos Celestes presentamos a un home que seguramente ninguén de nós tivo o pracer de velo xogar. Aínda que non é dos máis recoñecidos, foi un dos primeiros ídolos da afección, en definitiva, un dos xogadores máis representativos da historia do noso club que nunca debería quedar no esquecemento de ningún celtista, o granVenancio.

Venancio González Iglesias naceu o 8 de decembro de 1914 na vila ourensán de Ribadabia. Naqueles tempos do fútbol físico e campos impracticables, comezou a destacar Venancio xogando no equipo da súa terra. ¡Con 15 anos xa xogaba no primeiro equipo e como titular! Pronto chamou a atención de equipos máis importantes e o Ourense chamou ás súas portas. Despois dun par de tempadas cos ourensáns no ano 1933, con 19 anos, recalou no Celta de Vigo.

No conxunto vigués comezou xogando na segunda división pero, despois dun par de tempadas, o equipo logrou o ansiado ascenso a primeira división no ano 1936; Venancio foi peza clave. Venancio cumpliu un total de 12 tempadas xogando no equipo vigués amosando sempre unha profesionalidade e amor ás cores dignas de mención. Na súa derradeira tempada colaborou a que o Celta chegase ao seu maior éxito ata ese momento, a final da copa do xeneralísimo en Chamartín, que desgrazadamente perdimos por catro goles a un fronte ao Sevilla.

Venancio xogou un total 162 partidos co equipo vigués (99 en primeira) e conseguiu 9 goles. Pero Venancio non destacaba pola súa faceta goleadora. Era un extremo dereita á antiga usanza, moi rápido e vertical que gañaba con facilidade a liña de fondo e poñía uns milimétricos centros para que compañeiros da talla de Nolete, Pahiño ou Hermidita os remachasen ao fondo da rede.

O alcume de “Capitán Veneno” llo puxeron polo seu marcado temperamento. Unha maneira de ser causante de que non se enrugara por ningunha circunstancia; xa fora protestando aos arbitros (os seus grandes inimigos), arengando aos seus compañeiros ou encarándose co equipo rival. A lenda fala dunha anécdota que lle pasou nun derbi co Deportivo e que mostra ben ás claras o temperamento do extremo galego. Venancio, que era o capitán do equipo, foi expulsado no partido pero negouse a abandonar aos seus compañeiros. Ao final tiveron que sacalo do campo pola forza.

Venancio é sen dúbida un dos homes máis importantes na historia deste equipo. Foi o primeiro gran capitán, un home sacrificado polo ben do equipo antes do seu lucimiento personal, un home que renunciou a xogar en clubs máis grandes polo incondicional cariño que profesaba a este equipo, un home que continuou ligado ao Celta tras rematar a súa carreira, en resumo, un home que os celtistas non podemos esquecer porque forma parte da nosa historia.

Venancio, un mito entre os mitos.

A pé de Campo

Estreamos hoxe en TodoCelta unha nova sección “A Pé de Campo” na que a nosa amiga e compañeira de Localia, Belén Álvarez reflexiona sobre as sensacións que se viven no céspede de Balaídos partido tras partido. Grazas Belén.

A pé de campo a tristeza e a decepción fanse maiores… INMENSAS porque todo se magnifica a pé de campo….
Cando o público cheo de xúbilo pola vitoria do seu equipo anima sen descanso, cando soan as palmas e berros de alento, cando todos entonamos a Rianxeira, todo vese inmenso a pé de campo…. pero cando o público saca os seus panos brancos….. estes, tamén se ven INMENSOS A PÉ DE CAMPO ….
Hoxe á miña tristura súmase á miña decepción, a miña impotencia pero sobre todo ao meu enfado ….
¿Onde se viu que gañando 2-0 terminemos empatando…. ¡¡¡Ai, que impotencia sente un cando se viven situacións como as que onte vivimos!!!Balaídos era unha festa cando finalizaron os primeiros 45 minutos. Dous goles ao noso favor, todo presentábase de cor de rosas. A bancada cunha ilusión recuperada. Os xogadores felices, riseiros, como uns nenos con zapatos novos… e de súpeto, o que se intuía: Un gol …. logo outro e ….. a sufrir ata o final.

Vázquez pide perdón.

Hoxe en TodoCelta expresábamos a nosa indignación e analizabamos as declaracións de Fernando Vázquez na rolda de prensa posterior ao encontro fronte ao Rácing.

Agora, dende a directiva, chéganos unha pequena nota na que o míster se disculpa pola súa actitude :

“As desafortunadas declaracións feitas por min, na rolda de prensa do día de onte, non reflicten o tremendo respecto que me merece a afección celtista, polo que por medio deste comunicado descúlpome ante esta, dando todas as explicacións pertinentes na rolda de prensa do próximo mércores”.

Rectificar é de sabios, e asi o fixo Fernando Vázquez quen sabe se presionado dende arriba. De tódolos xeitos é un xesto que lle honra. Chapeau polo mister.

Facendo calceta en Balaídos

Isto é o que facemos os apenas 13000 siareiros que nos congregamos en Balaídos. Ou polo menos é o que pensa o noso adestrador da afección.

Tal pensamento se desprende das declaracións de FV en rolda de prensa despois do partido de onte.

O técnico tildaba de “ilóxica” e de “falta de concentración no partido” aos asubios recibidos por parte da bancada cando o técnico retiraba a un recén entrado Lequi para meter, de novo, a un segundo dianteiro.

A humildade é unha característica da que carece o de Castrofeito. É algo coñecido por todos dende hai tempo, e non só en Vigo, senón tamén en Sevilla, en Valladolid, nas Palmas, en Santiago, etc …

O filial sí que gañou.

Nova heroicidade do Real Club Celta B, que obtén o seu segundo triunfo consecutivo e sitúase a un paso dos postos de permanencia. Con dez homes sobre o terreo de xogo, no tempo de desconto, o filial anotaba o 2-3 definitivo, na Cidade Deportiva do Sardinero, ante o Racing de Santander B.
O Celta B está realizando unha recta final de campionato sensacional. sumou sete puntos nos tres últimos encontros e colocouse a tan só dous da zona de salvación.

celtavigo.net